踏入 2026，二人組合 Fabel 重組。Fabel 成立於 2013 年，成員有主音 Lo/o（盧祝君）和鍵琴手J1M3，主打電子音樂，J1M3 曾表示即使十年後 Fabel 仍未有一首金曲，都不想放棄音樂定位。經歷 2019 年休團，今年再出新歌〈異托邦的求生法則〉，主題也跟這個城市相關。

Music Ten【Q&A 欄目】今期有 Fabel 

■ Q. 有咩契機令你們再次出歌？大家有冇唔同咗？

J1M3 : 契機源於一首以前未推出嘅 Demo。有日 Fabel 嘅監製 Alvin Leong message 我，話手頭上有首歌一直搵唔到適合人選，問我有無推薦。我即刻提議：「不如搵 LoLo 呀！」因為見到佢最近喺表演方面好活躍，特別係參與完麥浚龍演唱會迴響好大。就係因為咁，我哋三個走返埋一齊，重拾之前未完成嘅音樂夢。

經過這七年沉澱，隨住環境變化，我哋各自都有所成長。感覺大家處事上成熟咗，但心態上反而「青春」咗。因為內心對音樂嗰團初心之火仍然燒緊，甚至比以前燒得更紅更猛。真係估唔到七年之後，大家仲有緣份繼續一齊做音樂。

Lo/o :  Alvin 成功串連返呢兩個走得很遠嘅人，佢聽返舊嘅demo，佢覺得 Fabel 唔應該就咁完。

其實所有嘢都唔同晒，Lo/o 由 L 變咗 / ， Lo over o，意思係 0 分之 Lo，我覺得自己係 0，提醒自己由 0 開始，幾時都可以重新出發，唔需要成日為自己設限。J1M3 全名連姓都改埋，再唔係Jimmyfung，我而家叫佢做阿生。

■ Q. 當初點解會休團？

Lo/o：最正路不過嘅完結，合約完咗。當年 Fabel 1.0 嘅過程都好唔容易，絕對冇一帆風順。大家做好多嘢都好用力，但係見唔到成果。當年同 Jimmy Fung 都有冷戰有嘈交，同manage 嘅同事相處亦係一個挑戰。我係好怕掣肘嘅人，所以而家冇合約關係，反而更加自在。

J1M3 : 當初休團最主要係因為合約屆滿。嗰陣我好渴望喺 Fabel 以外嘗試更多唔同 Project，想試下轉型做獨立音樂 Producer 推出自己嘅作品。好開心呢七年裡面，我成功擴闊咗自己嘅音樂領域，除咗成立 GREYTONE 音樂品牌，亦展開咗「一張專輯一個星球」計劃。

■ Q. 介紹新歌〈異托邦的求生法則〉

J1M3 : 首先真係要多謝耀輝寫咗份咁好嘅詞，其實「異托邦」呢個 Concept 都係源自佢諗法。當初我哋交俾耀輝嘅文案入面，提到休團呢七年大家身處嘅環境發生咗好大變化，令我哋重新反思每日生活嘅目的——到底何謂生存？何謂生活？

今次嘅音樂風格亦融合 Post-Rock 同埋 Shoegaze 等元素，走一種比較冷艷、迷幻路線。希望能透過呢種氛圍構建一條「回憶隧道」，帶領大家抒發呢幾年累積嘅感受。

Lo/o : 多謝周耀輝填詞，賦予呢首歌異托邦嘅生命。我哋冇辦法好容易咁用一句說話去解釋呢首歌。我哋俾我地想要嘅方向俾耀輝，內容大概係想寫我哋活喺呢個城市，究竟我哋選擇咗生存定係生活？最後收到呢首詞好有驚喜，我亦嘗試用自己方法去揣摩呢首歌，冇試圖去問箇中細節。

■ Q. 2017 年 Fabel 在一個訪問說：「我覺得即使十年後 Fabel 仍然未有一首金曲，都唔想放棄個定位，唔想放棄小小 fan base。」現在你仍然咁諗嗎？

J1M3 : 雖然覺得呢段時間自己改變咗好多，但對於十年前嗰份初心，我始終無變過。我好熱愛每一件自己有份參與創作嘅作品。創作音樂除咗令自己感到被療癒之外，最美妙嘅地方係可以令有緣人一齊去感受作品裏面嘅化學作用。我一直深信「以生命影響生命」，即使無大熱金曲，只要將我哋嘅音樂傳遞開去，讓有緣人聽到，就已經係一件好快樂嘅事。

身為音樂人，我覺得每個市場都值得擁有唔同音樂風格嘅作品，咁樣先可以令我哋本地嘅聽眾，隨時都有更多唔同嘅選擇。

■ Q. 在香港做 EDM 電子音樂有沒有市場？

Lo/o : 冇啦，我哋其實一直都唔識諗市場。一向都唔跟大市，所以我地投資嘅金錢同時間都炒到燶晒。所以一直玩命，希望有一日大家可以留意到我哋嘅音樂實驗嘅成果，一直希望廣東話能夠有更多可能性係我哋嘅願景。

J1M3 : 當初啱啱組成 Fabel，我曾經懷住一個宏大信念，就係「我要改變香港樂壇」。過咗十幾年，我將呢個信念調整咗，由改變大環境，聚焦返喺「做好音樂」呢個本質上面。

我依然深信，Producer 同歌手係可以聯手創造一個更多元市場。除咗 Rock 或者 Hip Hop 之外，電子音樂絕對有能力獨當一面。雖然在我眼中，這一刻本地 EDM 市場可能仲係起步階段，但我仍然抱有希望，期望將來我可以成為推動這個浪潮的其中一份子。

相片提供 @fabelhk Photographer @lee_kai_ho And his team @sangpig @stevemak Make Up Artist & Hair Stylist @candiicexx @mua_queenie Wardrobe @432hz.official