陳健安第四張個人專輯《PROJECT REJECT》以拒絕作為命題，之前的訪問跟安仔傾過新碟概念，來到最後一篇，監製賴映彤接受 Music Ten 文字訪問，以監製的角度作一些總結，分享這次創作的心思。
-下列內容經整理-
▍問：《Life After Life》及新碟《PROJECT REJECT》都是你和 Oscar 包碟，陳健安的歌曲很有概念性和連貫性，作為監製，要包辦一整張專輯，有什麼需要衡量和考慮？
答：作為全碟的監製，我的考量點最主要，第一是歌曲的連貫性，有沒有聲音的貫徹性？不一定是講音樂類型要一樣，或者完全地用某一種樂器，才有連貫性，而是你將這個音樂，這隻歌，聽完之後，你聽另一隻歌，你會不會覺得它圍繞着這個 concept 的感覺，是否有符合呢？所以連貫性和點題，我覺得是緊要。
創作過程𥚃面，就算我是監製，我都好需要同另外兩位有好緊密的溝通，因為我要理解究竟他內心想做的創作，某一樣東西，畫面是什麼，他想表達的是什麼，我先可以諗吓有什麼方法，可以好好呈現到大家心𥚃面想要的畫面，或者大家就住某一樣東西，可能一隻歌，大家有的感覺係點，去了解多啲，就可以做到一樣大家都鍾意的東西。
我覺得這就是我作為成隻碟監製，會考慮的因素，主題貫徹，點樣可以有大家共同創作的東西放在𥚃面，而大家都喜歡。
▍問：新碟的創作過程中，最難忘是什麼？
答：今次做碟的過程，有兩樣嘢比較唔同，第一，其實咁耐以來我都冇試過同人一齊寫歌，因為過往一路以來都是我自己編哂，不論是我自己做音樂底，我自己做返 melody，又或者我哼了一個 melody，再做 arrangement，甚至乎 arrangement 同 melody 一齊進行，所以基本上，未有一個契機或者需要我同其他人去寫一隻歌。
至於今次點解要咁樣做？因為佢（陳健安）有一日同我講「喂！不如你俾個底我，我喺上面寫 top line」，其實就是這樣開始。最開初有少少猶豫，始終創作幾主觀，可能大家嗰 taste 好唔同，所以開頭有少少猶豫，但佢又好雀躍咁邀請我，咁好啦，我哋試吓啦，好彩佢都好好，佢會由得我，你想整咩你整，所以就有〈唔明你講乜〉，當時我哋都有來回微調 fine tune，arrangement 上面或者 melody。
但基本上，現在大家聽到的，都是一開始時已經有，做完呢隻大家都覺得好好玩，好開心，所以亦都有第二隻歌的出現，就係 #戀愛腦之死 ，做法都係一樣，都係我做一個音樂底，佢 on top 做 melody，這兩款音樂其實都係我鍾意嘅嘢，但平時未必預得啱有 project 可以做，所以今次我做咗呢兩款歌，其實我係幾開心。
▍問：相較過往的作品，這次做《PROJECT REJECT》，自己有什麼成長？
答：與其話，審視自己在哪一方面有特別的成長，我覺得是完成這個企劃，多了機會吸收一些經驗。我們作為創作人，每完成一個 project，當中的過程，創作的過程又好，製作的過程又好，總會遇到一些你要考慮的因素，點樣可以做得好啲，或者你要選擇用什麼聲音，很 technical 要解決的問題。
▍問：有人說現在是「單曲循環」的年代，你覺得做概念專輯的意義是什麼？
答：我覺得單曲循環同做概念專輯未必有對立關係，這個年代，大眾可能比較揀 single 聽，揀自己鍾意的歌聽，未必會順住隻碟，但不代表歌手就因為咁樣，只應該做呢樣（單曲）。
創作歌手和監製，其實一定要透過他的音樂去讓大家更加認識他，或者認識他的 branding，他是一個怎樣的人，透過做 concept album／EP，你會更加了解那個人的想法、喜好、聲音，以至他的成長，所以我覺得 concept album 對於一個想做音樂創作的歌手來說，是需要的。
| 【Music Ten】 ■ Text by Music Ten ■ 相片由受訪者及寰亞提供 ■ Week 31 專訪：監製賴映彤 更多音樂專訪？Follow IG https://www.instagram.com/musictenhk |
