J1M3 喜歡在家工作，他接受《Music Ten》訪問說，在家寫歌比較舒服，周圍環境有自己喜歡的裝飾，有磨豆咖啡機，飲杯咖啡便開工，累了，可以點香。

不過，參加 Songwriting camp，去別人 studio 或者去其他國家，跟新認識的音樂人合作，創作模式有不同，「我覺得屋企的創作模式可能多啲個人情感、私人情緒，去到 studio 冇咁 private。」

「我做咗音樂都十幾年，十幾年裏面有好多經驗，或者隨時一寫就可以寫到一啲音樂，商業角度上面，嗰啲音樂係 work，但有時創作係好 personal，呢啲歌我唔會賣畀其他歌手，我自己用，嗰啲歌可能就喺自己屋企，喺舒服狀態下寫，（感覺）會好少少。」

■ 幫人做歌壓力少啲

他表示：「好多時候寫歌未必真係要 for 寫歌，今日好唔開心，有啲嘢想發洩。」有時接 job 寫歌，他會先聽聽那位歌手的歌，再開始創作。工作無分日與夜，但通常夜晚、下雨、颱風和陰天的日子，靈感會多少少，但做自己作品，「自己有話想說，可能夜晚會多一啲靈感，始終多愁善感啲。」

自己出歌同幫其他音樂單位做歌，最大分別是什麼？J1M3 說，幫人做歌，壓力少一點，歌手有自己要求，有固定的音樂特色，以 KOLOR 或 Kendy Suen 為例，他們本身經營自己的 branding，大家合作其實是「mix with 他們的音樂，我的元素放在他們裏面。」

至於做個人 project，他能全權掌握作曲作詞，一首歌由哪個歌手演唱，自己唱出來的聲音又會是怎樣，他享受當中的樂趣，但最大難度是「冇人督住我做咩，要 maintain 自己的動力和音樂取態⋯ 自由度太大，大到好似真係要畀 deadline 自己，deadline 過咗就不可以再變（修改歌曲），如果唔係，你永無止境去做。因為我見到有些音樂人，對自己好高要求，可能花兩年做一個作品，都仲未出街，我都藉此為鑒，盡量有個時間畀自己完成，不要再改，不要再諗，要 move on 做新嘢。」

■ 每一年都發現自己進步

筆者問他，點為之寫完一首歌？「我有一種直覺，我會聽大概兩三個月，完成度有八成，就會 close file 再錄下一首，close file 的意思可能係未錄人聲或者未填詞，這首歌在音樂上的結構、output 已經完成，我會進入下一個階段，就是搵人寫詞，錄音，（思考）怎樣去推出這首歌。」

他不會花一兩年「雕琢」一首歌，但有時相隔幾年，重聽未見街的作品，他會修改。例如〈樹海〉是 2018 年寫的，2022、2023 年和今年分別推出廣東話、英文和日文版，「三個版本出街之前，我都仲有執過，每一年都發現自己進步了，每一年都發現自己可以做得好啲。」

疫情之前，J1M3 有段時間有很多創作，當時他主要做幕後。疫情之後，歌手開始找他做演唱會琴手和音樂總監，改變了他的工作模式，有穩定收入，但少了時間寫自己的歌，所以《Terra:LandeScape》或下一張月球主題的專輯，都採用 2018、2019 年的作品。

「冇錢點出碟呀，係咪先？」J1M3 的想法是：這幾年搵多啲錢，若經濟狀況許可，之後接少啲 job，留多些時間給自己創作。

【Music Ten】 ■ Text & Interview by Music Ten ■ 相片由受訪者提供 ■ Week 21 專訪：J1M3 更多音樂專訪 Follow IG  https://www.instagram.com/musictenhk