梁釗峰接受《Music Ten》訪問說，自己做緊其他嘢，譬如跑步，去廁所，沖涼，靈感就會到。創作環境不一定要「夜闌人靜」，有時候靈感唔到就唔到。

釗峰曲詞包辦的歌曲包括〈若然冬天沒有花〉、〈28天〉、〈萬惡不赦〉等，近年較少見他寫歌，他表示，一直有繼續創作，只是未被採用，「都要畀時間，可能唔係呢刻用，要畀佢（首歌）有個時間，或者有另一首歌更適合當下的自己。」

談起〈28天〉，他有時聽歌會聽到嚎哭，「老實說，有些歌曲聽咗好多次，我都覺得唔好再聽住，但隔一段時間，突然覺得，我曾經寫過呢啲嘢⋯提過自己，先會 feel 到心靈係咁強大，只不過面對的問題，有可能蒙在鼓裡。」所以同自己共振最大的，是自己手筆，出自自己心靈的作品。

就如〈28天〉歌詞，釗峰現在仍提醒自己，放下完美和接納自己，不要跟別人比較。他喜愛填詞，填詞作品當中，他覺得與 Jase 共同創作的〈時輪〉，歌詞寫得很好，這首歌收錄於 C AllStar《人類世》專輯 last track，「講這個社會係點睇自己，由自身、社會到宇宙。」

翻查資料，釗峰幾年前在電台訪問說過，〈時輪〉是關於時間、輪迴，他對歌詞有以下解讀：「當一樣嘢去到極壞的時候，呢件事會再傳承落去，就好似人類世咁樣，人類可以在世上留下足跡，令第時搵返我哋發生過的事情，得以延續。」