■ 結他手 Andrew Chong

「我係有啲 deadline fighter，但改緊。」他喜歡一個人在家創作，可以有很多不同的靈感，譬如瞓緊覺，瞓醒之前那個狀態（知道自己要醒，但仍然在床上），試過在夢裡有一段 line， 一起身，急不及待拿起電話哼，如果距離上班時間尚早，就會直接彈結他錄低。

■ 鼓手 Gill Mok

創作沒有分朝早定夜晚，他比較隨性，創作模式跟隨直覺，喜歡尋找火花。「坐喺樂器面前，做啲好當刻、無意識嘅嘢，未必直接掛勾到一啲能夠形容嘅感受，但嗰一刻我好想做，好想呈現嘅嘢。」

過程中，他喜歡同其他成員一起創作，「因為當我將一個直覺投射出來的時候，大家都會有反應，然後我好鍾意喺嗰個反應上面發展。」他說，寫 demo 可以好快，多數是大家 jam 出來，但聽錄音或整理時，要花一至兩星期完成。

■ 低音結他手 Kuma

跟鼓手 Gill 一樣，他是直覺型音樂人，「呢一刻 feel 到玩咩就玩咩」，鍾意和不同的人合作，會有新火花。創作沒有 schedule，有時行行下街，突然見到某一個景象有靈感，便拿手機拍下那個 moment，之後再整。

■ 主唱 Fengyi 逢一

創作時，他喜歡閉上眼睛，因為好像關閉了一個感官。「我很相信自己的直覺和想像，好多時候一首歌，某人拎咗個 chord 過嚟，我好快聽到佢應該係一個點樣嘅音色，先會表達到某種情緒，或者佢而家呢個狀態係比較冇靈魂，我會好快知道呢樣嘢冇靈魂，我點樣令佢有靈魂啲。」

逢一說，有句話好正：你最好的老師，一定是你聽大碟專輯的所有大師。「由細到大，我聽到 Michael Jackson 嘅歌，我會哼哂佢所有樂器，嘗試加我嘅 line 上去，可能聽到方大同，我都會嘗試加一條結他 line」

【Music Ten】 ■ Text & Interview by Music Ten ■ 相片由受訪者提供 ■ Week  15 專訪：Wantamnam 我地希望 更多音樂專訪 Follow IG  https://www.instagram.com/musictenhk